*** Nofonofo loa lāua, ti faitoe loa a le fafine la aia a Agotea. Nofonofo loa lātou, ti… ti fānau loa a Agotea aia… ko lo’ona a tama. Mafuli ake a ia o numinumi le toe la aia o ave o tī ki le li’ua la. Kae ano a ia o sopo mai, ko le gā kimoa, ti pati mai a ia: « Oi, ei loku taina, tio mai mu’a a koe ki le faigāne’a faikese. Ko leinei lo’ou la toe, e se fānau mai a ia ko se kilisiteano, kae fānau mai a ia ko le manu. » Pati le fafine la. Ti avatu loa le faka’ilo ki le tama la, ti pati mai a le tama la aia, ke tuku fa’i le manu ke ano ki le gāne’a o le manu. Kae nofo fa’i a ia mo la’ana la āvaga. Toe nofonofo lāua ti toe tina’e a le fafine la aia. Toe fānau a le fafine la aia ko le gā ta’ine, toe ave fa’i foki a le gā ta’ine la aia o ave o toe tī ki le li’ua la. Kae pati mai loa a le fafine la aia : « Ke tio mai mu’a a koe, ku toe fānau ake nei fa’i au la ko le manu. » Pati mai a le tama la aia, ke ave fa’i le manu ki le gāne’a o manu, kae nofo loa lāua. Sakinake loa kua ’ita a le tama la aia, ki lo’ona la āvaga. Kua ’aga loa a ia o fa’ī fakaveliveli. ’Aga loa a ia o ave o fakatu’u i le mala’e, sakinake e tosi e ia i ai, ka fia ’a’anu leia ti ano o ’a’anu ki ai. Sa’ele leia i tō le ala ka fia tamate, ti ano o tamate. Sakinake kua ’aga lātou o fa’ī (fakafena’aki). Ku papala ’oki a tino o le fafine la, i lana tu’u fakala’ala’a, tu’u ’uaina i ai. *** [Ti ko leinei tasi a ’aso kua ’aumai le logologo, a le finematu’a mei motu, ke lenā tama la ke nake] *** Na ko lona tupuna. Fanatu loa aia ki ai. Le’ai. Nofonofo ti pati a le sau la aia, ke fai se tika ko le ’ulutoa, ke fa’ī i le fenua lasi la. Pati loa a le finematu’a la aia i motu : « ’Au la ē oku mokopuna o pale, na ko leinei, *** a le tika ka fai i fenua lasi. Tie e, e kulu natu la loa, o, o kau i le tika la, ti kapau loa e vesili mai lenā *** le tagata la – talie, e nofo foki a le tama la aia ko le sau, o lenā le fenua la — ka vesili mai loa pe ko toe kolua o ai, ti fene’eki loa a kolua ti tagi loa le tagi la. » Kae tuku loa le tagi la, ka ko le tagi o lou tuaga’ane la, Ko lalāua lenā a fa’u a fā ’ulutoa e lua. O nake fa’i le tautuaga’ane la aia o pale ake fa’i i lenā le vai na lā tafea ai la. Nake lāua la e fai mai le tika la. Tika mai a le tama la aia o kalaga a ia i ai. Ti ’oki lenā a le tika a le tama la ti tu’u fakafētu’u a ia, kae tika mai le gā ta’ine la aia. Kae tika mai le gā ta’ine la aia o kalaga a ia. ’Oki ake loa i lenā le aso la, ti fifili loa le sau la aia, pe ko toe loa anā o ai e kalaga i le ala kae koi sā la foki le tama, i lenā le fenua la, mo lenā le gā ta’ine la. Pati loa a ia : « Ko leia ake loa le aso la, ke tānaki fuli loa a toe o lenā a le fenua la, o tasi fakasāsā a le tamana mo le tinana. » *** Ko lenā loa a le pati a le sau la aia ti ifo loa lāua, toe ano ki lolā tupuna la. O ano lāua o pati ki lolāua la tupuna, e nake lāua la talie ko le tonu a le sau la, ka toe fai le tika i apogipogi la, ti e fakasāsā le tamana mo le tinana o le tika la. Io mai loa a le finematu’a la aia. Pati mai a ia: « Ufī, ti ko lenā fa’i le ne’a e kulu tagi ai la, ’au! » Ko la’ana lenā fano o tau manogi tau manogi, o fai a teu o leia, fai a teu o leia. Ti *** pale ake loa lāua. Nake loa lāua i lenā le aso la, o ’uluaki fai mu’a le tika la. Toe tika fa’i le tama la aia o kalaga, ti toe tika atu fa’i a le ta’ine la aia o kalaga. Pati mai loa ke tānaki fuli a toe ki le mala’e, kae tasi fakasāsā ona mātu’a. Ti ko lenā loa lolātou la a tānaki ti tasi faka’ilo lona tinana mo lona tamana. Kaku atu loa a le fakavesili kia lāua la, ti fene’eki loa a lāua a tagi: « Ko au, ko au, ko kie, fakatafetafe i le kumete, tau ki le motu ko Māfule, fagogo au e Alefeke, la’a o le toa na piko ki vai, loku no’a kula e tau i ai, ko au ko le vosa o Vāvākitoga. » Ti pati mai loa le sau la aia, ka ko le igoa la foki o le sau la, ko Vāvākitoga, e se fa’a logo mālie foki a le sau la aia. Ka kua ’aumai fa’i ki le sau la : « Oiau ma’uli e pati si’i lāua mei muli la, ko lolāua si’i a tamana ko Vāvākitoga » Pati mai loa a le sau la aia : « Pati atu ke sōsō mai, ke sōsō mai lāua o sua mai. » Toe sōsō’aki mai loa a le gā tautuaga’ane la, o toe fai mai lāua, o toe tagi: « Ko au, ko au ko kie, fakatafetafe i le kumete, tau ki le motu ko Māfule, fagogo au e Alefeke, la’a o le toa na piko ki vai, loku no’a kula e tau i ai. Ko au ko le vosa, o Vāvākitoga ! » Ko le ’oso mai loa lenā o le sau la aia, o sogi fa’i mei le fā’ulu o leia o tuku ki va’e, sogi mei le fā’ulu o leia o tuku ki va’e. Ko le mavete atu loa lenā a le fenua la aia, kae pati atu loa a lāua, ki le sau la, ke ano la ē a ia o sa’u mai a lolāua a tinana, na ka papala ona kuaga mo le tu’u fakala’ala’a i le mala’e la. Ko le ano loa lenā a le tagata la aia, o sa’u mai a le fafine mei le gāne’a leia na, fakatu’u ai la, o ave loa, ko la’ana loa a kauga. ko lona fāfā sa’ele o le fafine la o ave o faito’o e le sau la aia. *** Ti ’aga loa a le sau la aia o fakanofo a lona tama la ko le sau, Kae nofo loa a le ta’ine la aia o fakalogo fa’i i lenā a le fenua la. Kua gato mu’a le gā ne’a.